UMMÆLI

“Í dag fekk eg høvi at koma í Varpið til eykasýningina av “Gandafloytan” eftir Mozart. Tað er Birita Adela, sum er leikstjóri og hevur umskrivað leikin til eina stuttsøgu.

Trappan í foyerinum var stúgvandi full; har sótu vaksin og børn, sum høvdu leitað sær inn at síggja leikin.

Tað var hugtakandi at uppliva Biritu syngja opera, tá hon leiddi okkum inn í leikin og vísti okkum, hvat operasangur er. Í innleiðingini vóru vit eisini tikin við í leikin og fingu ein leiklut – at syngja og klappa.

Birita las søguna upp, meðan operetturnar spældu og sungu. Hetta var ein styttri útgáva, ætlað børnum frá 3 til 10 ár og tók áleið hálvan tíma.

Tað var áhugavert at síggja góða samspælið millum Biritu, sum fortaldi søguna, og operetturnar, sum eru skúlagentur í 4. fl.

Operetturnar dugdu ómetaliga væl at spæla sín leiklut við sjónleiki, sangi, dansi og ljóðførum. Tær vóru stuttligar, lívligar og fríar við nógvum yvirskoti, og tær hugbundu okkum, sum sótu á trappuni.

Onkra løtu helt eg, at onkur leikari hevði gloymt sínar replikkir, men tað var altso ein partur av spælinum, og hetta var so ómetaliga gott, tí júst hetta vísti eisini, hvussu góðir leikarar tær vóru. Tað var týðiligt, at tær høvdu tað stuttligt og hvíldu í tí, sum tær gjørdu. Fantastiska góðar!

Tað er gott at síggja, at tað eru vaksin sum Birita, sum brenna fyri uppgávum sum hesari og leggja nógva orku og tíð í at skapa nakað, sum kann vera til gangs fyri onnur og fyri nærumhvørvið.

Tvey ára gamla ommudótturin, sum var við, var heilt hugtikin av tí, sum fór fram á pallinum. Hon var hugbundin av operettunum og leiklutunum tær høvdu og búnunum, og hon fylgdi væl við, tá tær spældu sínar leiklutir og á ljóðførini.

Hetta var ein góð, stuttlig og kveikjandi uppliving. Fyri ommudóttrina var hetta serliga kveikjandi, tí hon eisini hevur fingið dugnaligar fyrimyndir at síggja upp til. Hetta við góðum fyrimyndum er so sera umráðandi.

Tað hevur stóran týdning fyri børn og ung í Norðoyggjum at hava góðar møguleikar at koma til ymisk tiltøk og til ein leik sum hendan. Tað eru eisini nógvir næmingar á Skúlatrøð, sum í hesum døgum hava notið gott av møguleikanum og hava sæð Gandafloytan í Varpinum – líka yvir um vegin, og so eru vit í eini aðrari verð.

Kann avgjørt viðmælast!”

- Gunrið Kallsberg, 5. mai 2025

Myndir: Høgni Louisson Poulsen